Recriwtio Prif Weithredwr

Croeso gan Colin Dennis, Cadeirydd

Annwyl ymgeisydd,

Rwy’n falch iawn eich bod yn ystyried gwneud cais am swydd Prif Weithredwr Ymddiriedolaeth Brifysgol GIG Gwasanaethau Ambiwlans Cymru.

Heb os, y blynyddoedd diwethaf hyn fu’r rhai anoddaf yn hanes ein sefydliad. Er gwaethaf nifer o heriau, rydym yn parhau i arloesi ac i wneud ein gorau glas dros ein cleifion. Mae gennym lawer o bobl wych ledled Cymru sy’n gwneud llawer o bethau da; mae sicrhau bod yr arweinyddiaeth gywir a’r cymysgedd cywir o sgiliau a phrofiad ar frig y sefydliad yn bwysicach nag erioed wrth i ni barhau â’n taith tuag at gyflawni ein gweledigaeth hirdymor uchelgeisiol.

Fel gwasanaethau ambiwlans eraill a sefydliadau’r GIG ledled gwledydd Prydain, rydym yn wynebu pwysau cynyddol a rhaid i ni barhau â’n taith o drawsnewid er mwyn sicrhau a chynnal gwasanaethau sy’n gallu diwallu gofynion sy’n tyfu ac yn esblygu’n barhaus. Er ein bod yn wynebu’r un pwysau ariannol, ein nod parhaus yw darparu gofal a gwasanaethau diogel ac o ansawdd uchel i’r cyhoedd. Bydd angen i ni sicrhau bod ein ffocws ar ganlyniadau clinigol a diogelwch yn parhau i fod yn ganolog a bod gwasanaethau’n cael eu darparu yn y ffordd fwyaf effeithiol ac effeithlon posib.

Mae rôl hanfodol diwylliant i lwyddiant yr Ymddiriedolaeth yn dod yn fwyfwy amlwg, ac mae’n effeithio ar bopeth o enw da a brand i ymgysylltiad gweithwyr ac, yn y pen draw, y profiad i gleifion. Rydym wedi gweithio’n galed i wella ein diwylliant sefydliadol, i roi’r hyder i gydweithwyr godi’u llais a’n herio pan fyddant yn gwybod nad yw rhywbeth yn iawn, i rannu eu syniadau a herio ein ffordd o feddwl, i sicrhau amgylchedd lle rydym yn ddiogel i ddod â ni ein hunain yn gyfan i’r gwaith, a bod menywod a’r rhai mewn grwpiau sydd wedi’u hymyleiddio yn teimlo’n hyderus ac yn ddiogel. Rydym am ailddiffinio beth yw ystyr bod yn wasanaeth ambiwlans ac, er bod ffordd bell i fynd o hyd, credwn ein bod yn arwain y ffordd, fel sydd i’w weld gan ein henw da cenedlaethol a rhyngwladol cynyddol fel gwasanaeth ambiwlans sydd ar flaen y gad o ran newid er gwell.

Rydym yn sefydliad uchelgeisiol ac ymroddedig ac yn chwilio am arweinydd sy’n ymgorffori’r dyheadau hynny; rhywun sydd wedi ymrwymo i gleifion a’n pobl, sydd â phenderfyniad a phwrpas, ond sydd hefyd yn cysylltu â phobl ar lefel ddynol iawn. Mae angen rhywun arnom sy’n gallu cyflwyno dadleuon grymus i’r llywodraeth a rhanddeiliaid dylanwadol, gan gadw hyder ein staff a’n cleifion; rhywun sy’n gwrando ac yn deall pwysigrwydd hanfodol ein gwasanaeth i bobl Cymru, sy’n dibynnu arnom pan fyddant ar eu mwyaf agored i niwed, a rhywun sydd â’r gostyngeiddrwydd i dderbyn her ac ymateb yn gadarnhaol. Rhaid i’n Prif Weithredwr nesaf fod yn rhywun sydd wedi ymrwymo i weithio mewn partneriaeth â’n hundebau llafur, comisiynwyr, llywodraeth, tîm arweinyddiaeth a phobl Cymru i barhau i siapio a darparu gwasanaethau a fydd yn diwallu anghenion cleifion nawr, ac am flynyddoedd i ddod.

Heb os, bydd hon yn swydd gyffrous, heriol a gwerth chweil, a byddwch yn ymuno â thîm arweinyddiaeth gweithredol a Bwrdd cryf ac ymroddedig, sydd wedi ymrwymo i gyflawni ein gweledigaeth a’ch cefnogi i lwyddo. Mae hwn yn gyfle unigryw, ac os ydych chi’n rhannu yr un cyffro â mi am yr hyn y gallwn ni ei gyflawni a’ch bod yn awyddus i ymuno â mi a fy nghydweithwyr ar y Bwrdd i wneud gwahaniaeth gwirioneddol wrth wireddu pethau, yna rydym yn edrych ymlaen at gael eich cais.